Құнды дағдылары бар мамандарға В9 визасы берілмек
АСТАНА. KAZINFORM – Құнды дағдылары бар шетелдік мамандарға Қазақстанда тұрақты тұруға құқық беретін В9 визасын енгізу жұмысы жүргізіліп жатыр. Бұл туралы Сенат депутаттарының сауалына Премьер-Министрдің орынбасары Тамара Дүйсенованың жауабында айтылған.
«Сыртқы істер министрлігі Қазақстан үшін құнды дағдылары бар мамандарға тұрақты тұруға құқық беретін В9 визасын енгізу бойынша жұмыс жүргізіп жатыр. Түзетулер заң жобасы шеңберінде көзделген. Қабылданып жатқан іс-шаралар технологиялардың трансфертін және ұлттық кадрларды даярлауды қамтамасыз ететін кәсіби біліктілігі жоғары дәрежесі бар тапшы кәсіптер бойынша шетелдік мамандарға баса назар аудара отырып, білікті еңбек мигранттарын Қазақстанға тартуға мүмкіндік береді», - деп атап өтеді вице-премьер жауабында.
Тамара Дүйсенованың атап өтуінше, ел экономикасына сұранысқа ие мамандарды тарту мәселелері Үкіметтің ерекше бақылауында.
