Құрбан айт қарсаңында Қарағандыда мал сою орындарына тегін автобус қатынайды

ҚАРАҒАНДЫ. ҚазАқпарат - 31 тамыз күні Құрбан айт мерекесі қарсаңында тұрғындардың құрбандыққа шалатын малдарын сою орнына жеткізу арнайы тегін автобустар жүреді, деп хабарлайды «ҚазАқпарат» ХАА тілшісі.

Облыстық орталық мешіт пен қалалық №1 мешітінен Республика даңғылы, 72/1 мекенжайында орналасқан мал сою орнына дейін екі автобус барады. Бұл автобустарда жүру тегін. Қарағанды облысы дін істері жөніндегі басқарманың бас маманы Қайсар Ақпаровтың мәліметінше, мал сою орны - бұрынғы «Тұлпар» ЖШС автобазары маңында.

«Алаңда бір уақытта бірнеше адамның бір-біріне еш кедергісіз құрбандық шалуына жағдай жасалған. Аумағы шамамен 30 гектар жерді қамтиды. Мал сою орны ветеринарлық және санитарлық талаптарға толықтай сай - орталықтандырылған су және санитарлық тораптармен жабдықталған», - деді Қайсар Ақпаров.