Күрестен Азия чемпионаты: Қазақстандық балуан қыздар алғашқы жүлдесін жеңіп алды
НҰР-СҰЛТАН. ҚазАқпарат - Делиде (Үндістан) күрес түрлерінен өтіп жатқан Азия чемпионатында ел қоржынына әйелдер күресінен алғашқы жүлде түсті, деп хабарлайды ҚазАқпарат тілшісі.
Атап айтсақ, әйелдер күресінен 50 келі салмақта ел намысын қорғаған Валентина Исламова қола медаль үшін өткен кездесуде вьетнамдық қарсыласын 10:0 есебімен ұтып, үздіктер қатарынан көрінді.
Сондай-ақ, бүгін тағы үш балуан қызымыз қола медаль үшін сынға түседі. Олар - 55 келідегі Марина Зуева, 59 келіде Мәдина Бақбергенова және Эльмира Сыздықова.
Айта кетейік, кеше грек-рим күресінің шеберлері жарысты аяқтап, бүгін әйелдер арасындағы бәсеке басталған болатын. Грек-рим балуандары құрлық додасын бес медальмен аяқтады. Оның біреуі - алтын, біреуі - күміс және үшеуі - қола медаль. Нәтижесінде жалпы есепте 136 ұпаймен үздік үштіктен көрінді.
Азия чемпионатында 190 ұпай жинаған Иран құрамасы көш бастаса, екінші орынды 146 ұпай еншілеген Өзбекстан құрамасы жеңіп алды.
