Құрылыс кодексі Алматыдағы тұрғын үй кешендерінің биіктігін қалай реттейді

АСТАНА. KAZINFORM – Сейсмика мәселесі аясында Алматыдағы аудандарға байланысты бірнеше қабатты тұрғын үйлер салуға рұқсат етіледі. Бұл туралы ҚР Өнеркәсіп және құрылыс вице-министрі Қуандық Қажкенов мәлім етті. 

Оның айтуынша, тау бөктері аймағында үш қабатты үйлер салу қарастырылған. Тиісті талаптар қала құрылысы регламентінде бекітіліп, қаланың бас жоспарын әзірлеуге негіз болады.

– Сейсмикалық және тектоникалық сызаттарға байланысты, сондай-ақ ғылыми-зерттеу институты жасайтын тиісті карталар негізінде нормативтер әзірленеді. Осы ереже аясында 5, 9 немесе 12 қабатты тұрғын үйлер салу аймақтары белгіленеді. Қала құрылысы туралы регламент осыны қамтиды, - деді Қуандық Қажкенов.

Бұдан бұрын хабарланғандай, бүгін Парламент Мәжілісінің жалпы отырысында Құрылыс кодексінің жобасы мен ілеспе құжат бірінші оқылымда мақұлданды.