Құрылтай сайлауына жұмсалған қаржының есебі қашан жарияланады
АСТАНА. KAZINFORM - Құрылтай сайлауын өткізуге бөлінген қаржының қалай жұмсалғаны туралы Орталық сайлау комиссиясының мүшесі Михаил Бортник айтып берді.
Оның сөзінше, республикалық бюджеттен бөлінген қаражаттың негізгі бөлігі өңірлердегі сайлау комиссиялары мүшелерінің еңбекақысын төлеуге және сайлауды ұйымдастыруға жұмсалды.
— Қаражат республикалық бюджеттен жергілікті атқарушы органдарға беріледі. Олар өз кезегінде қаржыны сайлау комиссияларына жеткізеді. Қаражат бюджет заңнамасына сәйкес жұмсалады. Сайлау науқаны аяқталғаннан кейін 60 күн ішінде оның қорытындысы шығарылады, - деді Михаил Бортник.
Ол нақты қанша қаражаттың қандай мақсатқа жұмсалғаны кейінірек жеке жарияланатынын айтты. Бұл мәлімет 60 күннен де ертерек дайын болуы мүмкін.
— 60 күн деп белгіленгенімен, біз бұл жұмысты созбаймыз. Егер есеп ертерек дайын болса, міндетті түрде хабарлаймыз, — деді ОСК мүшесі.
Айта кетейік, бұған дейін Құрылтай депутаттарының сайлауын өткізуге Үкімет резервінен 34,3 млрд теңге бөлінгені хабарланды.
