Қыдырәлі Болманов пен Қарақат Әбілдина «Қазақстанда жасалған» акциясын қолдады
АСТАНА. ҚазАқпарат - Қазақ эстрадасының танымал жұлдызды жұбы Қыдырәлі Болманов пен оның жұбайы Қарақат Әбілдина отандық ойыншық өндірушілерді қолдауға бағытталған «Қазақстанда жасалған» акциясын қолдады.
Қыдырәлі Болманов «Бал-бала» балалар ойыншықтарын шығаратын алғашқы қазақстандық компанияның авторы және басшысы ретінде белгілі.
«Әлемде біздің ойыншықтардың аналогы жоқ. «Бал-бала - Қазақстан тарихындағы алғашқы бренд. Ол Қазақстанда ғана емес, әлемнің басқа елдерінде де таныла бастады. «Қазақстанда жасалған» акциясы қазақстандық бизнесті дамытуға қосымша мүмкіндік ашады», - деді Қ. Болманов журналистерге берген сұхбатында.
Еске салсақ, компания Алдар Көсе, Тазша бала, Ер Төстік сияқты қазақ фольклорының кейіпкерлерінің де, өмірде болған адамдардың да прототиптерін ойыншық желісінде шығарады.
«Бал-бала» ойыншықтарының басты, бірегей ерекшеліктері олардың қазақстандық нарыққа бейімделуі. Ойыншықтар би билейді, ән айтады, қазақ тілінде сөйлейді. Қазір желіде 17 атау бар, оның 11-і жұмсақ ойыншықтар.
«Қазақстанда жасалған» акциясын іске қосу идеясы алғаш рет Үкіметтің кеңейтілген отырысында айтылған, ҚР Президенті Н. Назарбаев қазақстандықтарды отандық өнімді сатып алуға шақырды.
