Қылмыстық процестен тергеушінің айып тағу институты алынып тасталады - Мәжіліс
АСТАНА. ҚазАқпарат - Бүгін Парламент Мәжілісінің жалпы отырысында «Қазақстан Республикасының кейбір заңнамалық актілеріне қылмыстық іс жүргізу заңнамасын жетілдіру мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданды.
Аталмыш құжат қолданыстағы заңнама нормаларын Қылмыстық іс жүргізу кодексінің жобасына сәйкес келтіру, сондай-ақ қылмыстық процесті одан әрі жетілдіруге бағытталады.
«Ілеспе заң жобасын қабылдау жаңа редакцияда әзірленген Қылмыстық іс жүргізу кодексінің нормаларына сәйкестендіріледі. Сонымен қатар, тергеуге дейінгі тексеру, тергеушінің айып тағуы, соттың істі қосымша тергеуге қайтару институттары алынып тасталады. Оның есесіне сотқа дейінгі іс жүргізу процесі жетілдіріліп, тергеуші мен прокурор арасындағы байланыстар пысықталады. Жедел-іздестіру қызметі мен жасырын тергеу әрекеттерін жүзеге асыру кезінде жеке адамның құқықтары мен бостандықтарын сақтау нормалары айқындалады», - дейді депутат Рамазан Сәрпеков.
