Қырғызстан президенті қазақстандықтарды Астананың 20 жылдығымен құттықтады
АСТАНА. ҚазАқпарат - Қырғызстан президенті Сооронбай Жээнбеков қазақстандықтарды Астананың мерейтойымен құттықтады. Қырғызстан басшысының видеоқұттықтауын Қазақстан Президентінің Телерадиокешені жариялады, деп хабарлайды «ҚазАқпарат» ХАА тілшісі.
«Сіздерді бауырлас Қазақстанның даңқты елордасы - Астананың мерейтойымен шын жүректен құттықтаймын. Астана - бізге туысқан мемлекеттің саяси және экономикалық жетістіктерінің қаласы. Ол елдің артып келе жатқан қуаты мен болашақтағы өркендеу әлеуетін көрсетеді», - деді Сооронбай Жээнбеков.
Қырғыз Республикасының басшысы Астананың дамуы тәуелсіз Қазақстанның қалыптасу тарихының құрамдас бөлігі екенін атап көрсетті.
«Астана алдағы уақытта да тәуелсіз Қазақстанның, оның көпұлтты халқының бірлігінің, жасампаздық күш-қуатының символы ретінде дами берсін, гүлдене түссін. Туысқан Қазақстан халқына амандық, бейбітшілік және гүлдену тілеймін», - деді ол.
