Қырғызстанның оңтүстігінде болып жатқан тәртіпсіздіктер салдарынан зардап шеккендердің ішінде Қазақстан азаматтары жоқ - ҚР СІМ
АСТАНА. Маусымның 14-і. ҚазАқпарат /Ернұр Ақанбай/ - Қырғызстанның оңтүстігінде болып жатқан тәртіпсіздіктер салдарынан зардап шеккендердің ішінде Қазақстан азаматтары жоқ. Бұл туралы бүгін Астанадағы апталық брифингте ҚР Сыртқы істер мнистрлігінің ресми өкілі Асқар Әбдірахманов мәлім етті.
Оның айтуынша, Ош қаласында Қазақстан Республикасының консулдығы жоқ. Алайда, Ресей Федерациясының ол жердегі Бас консулдығы Қазақстанның Бішкектегі Елшілігіне жәрдем көрсетуде. «Қазақстаннның Қырғызстандағы Елшілігінің мәліметінше, кеше, маусымның 13-і күні Елшіліктің жәрдемімен Қазақстанның 1 әйел азаматы күйеуімен және баласымен Оштан Бішкекке ұшақпен жеткізілді», деді С. Әбдірахманов.
Ресми өкіл Қазақстан мен Қырғызстан арасындағы шекарадағы өткізу бекеттері қалыпты режімде жұмыс істеп жатқанын атап өтті. «Қазақстаннның Қырғызстанмен арадағы шекарасы бұрынғы режімде жұмыс істеуде, шекара жабылған жоқ», деді ол.
