Қырғызстанның оңтүстігінде сел салдарынан көпір бұзылып, үй маңындағы аумақтарды су басты
БІШКЕК. ҚазАқпарат - Қырғызстанның оңтүстік аймақтарында толассыз жаңбыр салдарынан көпір бұзылып, үйлердің учаскелерін су басты. Бұл туралы Қырғызстан Республикасының Төтенше жағдайлар министрлігінің баспасөз қызметінен хабарлады.
«Жалал-Абад облысы Ала-Бұка ауданының Кош-Болот ауылында 17 мамырда сағат 14:00-де жауын салдарынан сел туындап, 4 тұрғын үйдің бақшалары мен қора-қопсысын су басты, ішкішаруашылық жолдар қиыршық тастармен толтырылды», - деп атап өтті ведомствода.
Ақпарат бойынша, Теңге ауылында сел Көксерек өзеніндегі Акпаралиева көшесі бойында орналасқан көпірге зақым келтірді. Сондай-ақ сел Көксерек өзеніндегі Каратопырақ көшесі бойындағы көпірді бұзды. Оның салдарынан 22 жанұяға баратын жол кесілді. Ақтайлак ауылында осы өзеннің Шейіт-Мазар учаскесінде көпірдің бір бөлігі қирап, төрт ауылға баратын жол жабылды.
«Таш-Арық ауылында 100 жанұяны сумен қамтыған жүйеге зақым келді. Шакафтар ауылында да осындай жағдай орын алды», - деп хабарлады ТЖМ.
