Қысқы Олимпиада: Бүгін медальдар кестесінің көшбасшысы ауысты
БЕЙЖІҢ. ҚазАқпарат - Қытай астанасы Бейжің қаласында өтіп жатқан Ақ Олимпиада ойындарында жалпы медаль кестесінде бүгін Норвегия құрамасы Германияны басып озды, деп хабарлайды ҚазАқпарат тілшісі.
Бейжіңде өтіп жатқан Ақ Олимпия ойындары бел ортасынан ауып барады. Күн өткен сайын медальға талас қыза түсуде. Бүгін жалпы есепте Норвегия құрамасы 9 алтын, 5 күміс, 7 қола (21) медальмен бірнші орынға көтерілді.
Ал төрт күн қатарынан көш басынан түспеген неміс құрамасының қоржынына бүгін жүлде бұйырмады.
Кешегі күнге дейін жеңіп алған 8 алтын, 5 күміс, 1 қола (14) медальмен екінші орынға түсіп қалды.
Командалық жалпы есепте үздік үшінші орынды түйіндеп тұрған АҚШ құрамасының еншісінде 6 алтын, 5 күміс, 1 қола (12) медаль жиынтығы бар.
Медаль көрсеткішімен үздік ондықта тұрған елдер:
1. Норвегия - 9 алтын, 5 күміс, 7 қола
2. Германия - 8 алтын, 5 күміс, 1 қола
3. АҚШ - 6 алтын, 5 күміс, 1 қола
4. Нидерланд - 6 алтын, 4 күміс, 2 қола
5. Швеция - 5 алтын, 3 күміс, 3 қола
6. Австрия - 4 алтын, 6 күміс, 4 қола
7. Ресей - 4 алтын, 5 күміс, 8 қола
8. Қытай - 4 алтын, 3 күміс, 2 қола
9. Швейцария - 3 алтын, 0 күміс, 5 қола
10. Франция - 2 алтын, 6 күміс, 2 қола
Айта кетейік, дәл бүгінге дейін Олимпиада медаліне қол жеткізген елдер қатары 26-ға жетті.
Оның ішінде 21 мемлекеттің қоржынында алтын медаль болса, 23 мемлекетте күміс жүлде бар.
Сондай-ақ, Бельгия, Латвия және Польша елдерінің қоржындарында бір-бір қола медальдан бар.
Өкінішке қарай Қазақстан қоржыны әзірге бос.
