Қытай басшылығы ковидті жеңгенін жариялады
БЕЙЖІҢ. ҚазАқпарат - Бүгін Қытай Коммунистік партиясы Орталық комитеті Саяси бюросының Тұрақты комитетінің отырысы өтіп, онда Қытайдың өткен жылдың қараша айынан бері COVID-19 инфекциясының алдын алу және бақылау саласында ірі және шешуші жеңіске жеткені атап өтілді. Бұл туралы ҚазАқпарат «Синьхуа» агенттігіне сілтеме жасап хабарлайды.
«Қытай басшылығы коронавируспен күресте «үлкен және шешуші жеңіске жеткенін» жариялады. 17 ақпан, жұма күні ҚКП ОК Саяси бюросының Тұрақты комитетінің отырысынан кейін жарияланған мәлімдемеде Қытай қараша айынан бастап салыстырмалы түрде қысқа мерзімде пандемиядан қалыпты өмірге «мінсіз көшкенін» мәлімдеді. Тәжірибе ОК-нің пандемияға қатысты жағдайды бағалауда дұрыс шешімдер мен стратегиялық түзетулер қабылдағанын дәлелдеді«, - делінген құжатта.
Жиын ҚХР төрағасы Си Цзиньпиннің төрағалығымен өтті.
Қытай мемлекеттік БАҚ-тың хабарлауынша, коронавирус пандемиясы кезінде елде 200 млн-нан астам ауру жұқтырған адамға медициналық көмек көрсетілді, 800 мыңға жуық ауыр науқас емделді, бұл ретте «Қытайда COVID-19 вирусынан өлім деңгейі әлем бойынша ең төмен болды».
«Қытай адамзат тарихында ғажайып жасады», - деп хабарлайды Синьхуа агенттігі.
Сондай-ақ агенттік Қытайдағы жағдай жақсарып, вирус әлемнің басқа бөліктерінде таралып, мутациялануын жалғастыруын атап өтті.
Желтоқсан айының басында ҚХР үкіметі локдаун, мәжбүрлі карантин және халықты жаппай тестілеу арқылы коронавирусқа қатаң нөлдік төзімділік саясатын алып тастады. Қоғамдық денсаулық сақтау шенеуніктерінің бағалауынша, содан бері бір миллиардтан астам адам вирус жұқтырған.
Өлім туралы деректер енді жарияланбауда.
Deutsche Welle агенттігінің хабарлауынша, ресми мәліметтер бойынша, желтоқсанның басынан ақпанның басына дейін ауруханаларда тек 83 150 өлім жағдайы тіркелген.
Бұған дейін Қытайда коронавирус жұқтырған науқастарды орталықтандырылған оқшаулау жойылғаны хабарланған болатын. 2023 жылдың 8 қаңтарынан бастап Қытайға келетін адамдар үшін COVID-19 бойынша міндетті карантин талабы жойылған. Содан кейін Қытай Қазақстанмен шекарадағы карантиндік шектеуді алып тастады. COVID-19 шектеулері алынған соң Қытайға кіретін адамдар саны 50%-ға өсті.
Желтоқсан айында коронавирусқа қарсы шектеулер жеңілдетілгеннен бері Қытай алғаш рет ковидтен қайтыс болған адамдар саны туралы деректер жариялап, бір айда 60 мыңға жуық өлім жағдайы туралы хабарлады. ДДСҰ Қытайды COVID-19 індеті туралы жаңа деректерді жариялауға шақырды.
Фото: АР
