Қытай қазақтары терімен қапталған шаңғымен жарысты
АСТАНА. ҚазАқпарат - Қытайдағы Шыңжаң-Ұйғыр автономиялық өлкесінің Алтай ауданын «шаңғы отаны» деп те атайды. Мұнда 12 мың жыл бұрын тасқа қашалған шаңғы тепкен адамдар бейнеленген суреттер табылған. Жергілікті тұрғындар пайдаланатын тері шаңғылар ең ежелгі шаңғы түрлерінің бірі саналады, деп жазады Синьхуа агенттігі.
Шыңжаңның қазақтары мен моңғолдары теріден жасалған шаңғымен жарысады.
Көп ғасыр бұрын тері шаңғылар аңшылар мен шаруалардың негізгі көлігі болған. Шаңғының өзегін қарағай ағашынан жасап, сыртын жылқы сирағының терісімен қаптайды. Екпін алу үшін бір таяқты қолданған.
Қазіргі кезде шалғай таулардағы қысқы жайылымдарда теріден жасалған шаңғылар әлі күнге бақташылардың негізгі көлігі міндетін атқарып келеді. Алтай өлкесінде жыл сайын қыста көптеген арнайы жарыстар, соның ішінде тері шаңғылардың жарысы да ұйымдастырылады.
