Қытай мен Гонконгты жалғастыратын ұзындығы 40 метрлік жерасты құпия жолы табылды
АСТАНА. 26 желтоқсан. ҚазАқпарат - Қытай шекарашылары Гонконг полицейлерімен бірлесіп жүргізген арнайы шара барысында контрабандашылар қазып тастаған 40 метрлік құпия туннельді тапты. Бұл туралы Би-Би-Си хабарлады.
Туннельді қылмыскерлер контрабандалық тауарларды Гонконгтан Қытайға жеткізу үшін пайдаланып отырған.
Жерасты жолы Шэньчжэнь қаласындағы гараждың ішінен басталып, Гонконгтағы ерекше әкімшілік аймаққа қарасты қалың қамыс басқан тоғайға дейін созылған. Контрабандашылар туннельді электр және жеке вентиляция жүйесімен жабдықтағандығы анықталды.
Мамандар туннельді салуға кем дегенде төрт ай уақыт жұмсалған деп пайымдауда және бұл құрылыстың нарқын шамамен жарты миллион долларға бағалап отыр. Енді полицейлер Гонконгқа терезе ашқан «сәулетшілерді» іздестіру үстінде.
