Қытай мұз айдынында Абзал Әжіғалиев төртінші орынға ие болды

АСТАНА. ҚазАқпарат - Қытайдың Шанхай қаласында шорт-тректен Әлем кубогының үшінші кезеңі аяқталды, деп хабарлайды «ҚазАқпарат» ХАА тілшісі.

9-11 желтоқсан күндері өткен додада ел намысын қорғаған қазақстандық спортшылардан «А» тобында 500 метр қашықтықта Абзал Әжіғалиев төртінші орынға ие болды.

Бұл сында бірінші орынды қытайлық У Дацзинь, екінші орынды венгриялық Шаонг Лю, үшінші орынды ресейлік Виктор Ан жеңіп алды.

Ал «В» тобында өнер көрсеткен отандасымыз Айдар Бекжанов өз тобында бірінші орын алғанымен, жалпы есепте бесінші орынға табан тіреді. Тағы бір жерлесіміз Дениз Никиша 23- орыннан көрінді.

Жалпы, әлем кубогінің үшінші кезеңіне 50 елдің ең мықты спортшылары қатысты.

Естеріңізге сала кетейік, Американың Солт Лэйк Сити қаласында шорт-трек спортынан Әлем кубогының екінші кезеңінде  Абзал Әжіғалиев 500 метр қашықтықта чемпион атанып, өз есімін тарихқа жазған болатын.