Қытайда COVID-19-ға қарсы 800 миллионнан аса вакцина салынды
БЕЙЖІҢ. ҚазАқпарат – Қытайда жаңа коронавирус инфекциясына қарсы 800 миллионнан аса вакцина салынды. Бұл туралы сәрсенбі күні Қытайдың Денсаулық сақтау істері жөніндегі мемлекеттік комитетінен мәлім етті, деп хабарлайды ҚазАқпараттың меншікті тілшісі.
Бейінді ведомствоның ресми деректері бойынша, 2021 жылдың 9 маусымында 31 провинция мен Шыңжаң өндірістік-құрылыстық корпусында барлығы коронавирусқа қарсы вакцинаның 808 962 000 дозасы егілген.
Қытайдың Денсаулық сақтау істері жөніндегі мемлекеттік комитеті осы жылдың аяғына дейін халықтың кем дегенде 70%-ы COVID-19-ға қарсы екпе алады деп күтеді.
Өткен тәулікте құрлықтық Қытайда COVID-19 жұқтырудың 16 жаңа оқиғасы (олардың 8-і – жергілікті) тіркелген, өлім саны жоқ. Коронавирусты жергілікті жұқтырудың сегіз оқиғасы да Қытайдың оңтүстігіндегі Гуандон провинциясында анықталған.
Соңғы ресми деректерге сүйенсек, құрлықтық Қытайда COVID-19 жұқтырған науқастардың 94,47%-ы жазылып шыққан. 2019 жылдың желтоқсанынан бастап коронавирус жұқтырғандар саны 91 316-ға жетті. Өлім көрсеткіші – 5,07% (коронавирустан 4 636 адам қайтыс болған).
Руслан Сүлейменов
