Қытайда «Қазақ ұлтының салт-сана мәдениеті» атты кітап жарық көрді
АСТАНА. Желтоқсанның 28-і. ҚазАқпарат /Бақытжол Кәкеш/ - Қытайдағы Шынжаң ғылым-техника баспасында қазақ, қытай, ағылшын, орыс тілдерінде «Қазақ салт-сана мәдениеті» атты көлемді суретті кітап жарыққа шықты,
деп хабарлайды ҚазАқпарат Қытайдағы «Халық газеті» (www.people.com.cn.) сайтына сілтеме жасап.
Бұл кітап Қытай Халық Республикасының 60 жылдығына тарту ретінде Шынжаң автономиялы өлкелік әкімшілігінің ақпарат-баспасөз мекемесі бастырған маңызды басылым. Кітап авторы ــ Шынжаңдағы қазақ ұлтының белгілі фотосуретшісі Түсіпбек Сіламқұлұлы. Аталмыш еңбек бай мазмұнды сурет материалдары мен жаңа тұжырымды түсініктемелері арқылы салт-сана ғылымы тұрғысынан қазақ ұлтының еңбекшіл де ақжарқын мінезін, қажырлы да қарапайым ұлттық дәстүрін айшықтап көрсеткен. Бұл еңбекте қазақ жұртшылығының өндірістік еңбекпен шұғылдануын және күнделікті өмір тұрмысын, сондай-ақ айырықша сахара мәдениетінен сыр шертетін мол суреттер қоры арқылы көрнекіленіп, басылымды тарихи материалдық және құжаттық тұрғыдан тартымды ете түскен.
