Қытайда нөсер жауын мен дауыл кезінде 78 адам қаза тапты (ВИДЕО)

БЕЙЖІҢ. ҚазАқпарат - Қытайдың Цзянсу провинциясындағы Яньчэн қаласында және елдің шығысындағы өзге де қалаларда нөсер жаңбыр мен алапат дауыл салдарынан 78 адам көз жұмып, 500 тұрғын жарақат алды.

Жергілікті биліктің хабарлауынша, 200-ге жуық зардап шегуші ауыр жарақат алған, олар мүшкіл халде жатыр. Қазіргі уақытта іздестіру-құтқару жұмыстары аяқталмаған, билік өкілдері құрбандардың саны өсуі мүмкіндігін жоққа шығармайды. Бірқатар елді мекенде электр тоғымен қамтамасыз ету мүмкін болмай отыр.

Нөсер жаңбырлы дауыл Цзянсу провинциясының бірнеше ауданында 23 маусым күні түстен кейін басталған. Табиғат апатын көргендердің айтуынша, қатты жел көліктерді аударып, ағаштарды сындырып, үйлердің шатырын жұлып әкеткен. Билік зардап шеккен аудандарға гуманитарлық көмек жіберді, оның ішінде мыңға жуық баспана-шатыр мен 2 мыңнан астам төсек бар.

China Daily газетінің электронды нұсқасының жазуынша, дауыл екі зауытты қиратқан. Басылымның хабарлауынша, мекемелерде қауіпті химикаттар сақталған, алайда қауіпті заттар қоршаған ортаға таралып кетуіне қатысты мәімет берілмеген.

Метеорологтардың хабарлауынша, желдің қарқыны кей жерлерде 35 м/с-ге жеткен.  Бұл дауыл 1966 жылы Яньчэн қаласында соққан дауылдан кейінгі ірі табиғат апаты ретінде тіркелді.