Қытайда соңғы аптада А/H1N1 тұмауын жұқтырғандардың саны 6 345 адамға жетті
БЕЙЖІҢ. Қазанның 30-ы. ҚазАқпарат /Руслан Сүлейменов/ - 2009 жылы қазанның 26-28-і аралығында Қытайдың құрлықтағы бөлігінде «доңыз тұмауын» жұқтырудың жаңа оқиғаларының саны 6 345-ке жетті,
деп хабарлайды Қытай Халық Республикасының Денсаулық сақтау министрлігі.
Хабарламаға сүйенсек, науқастардың тек үшеуі ғана шетелден келгендер, қалғандары ауруды елдің ішінде жүріп жұқтырған. Министрліктің мәліметі бойынша, осынау қауіпті тұмау вирусы тарай бастағаннан бері Қытайдың құрлықтағы бөлігінде 42 009 науқас анықталған, оның 30 854-і - сауығып кеткен. 66 жағдайда аурудың барысы ауыр жүрген, дәрігерлер ауыр сырқаттардың тек 22-сін ғана емдеп, жаза алған, 4 оқиға кісі өлімімен аяқталған, қалғандары әлі интенсивті ем-дом қабылдауда.
Бейжің денсаулық сақтау бюросының мәліметтеріне сүйенсек, Бейжіңде қазанның 28-індегі жағдай бойынша А/H1N1 тұмауы бойынша күрделі жағдай қалыптасып отыр. Атап айтқанда, қазанның 28-індегі жағдай бойынша жаңадан жұқтырылған және зертханалық жолмен расталған оқиғалардың саны 400-ден асқан.
Бюро директоры Фан Лайиннің айтуынша, Бейжіңде әдетте тұмау маусымының шарықтау шегі желтоқсан мен қаңтар айларына келетін, бірақ биыл өткен жылдардағыдан 1-2 айға ерте келіп отыр және індеттің негізгі штамдарының бірі - А/H1N1 тұмауы.
Ағымдағы жылы қазан айының соңына қарай Қытайда А/H1N1 тұмауына қарсы 26 миллион бірлік вакцина жиналып, сақтауға дайын болатынын айта кету керек, және сол кезден бастап тапсырыс көлемі 100 миллион бірлікті құрайтын вакцинаның екінші партиясының өндірісі басталмақ.
