Қыз ұрлап, ата-анасынан ақша талап етпек болыпты - апталық брифинг
АСТАНА. Сәуірдің 28-і. ҚазАқпарат /Айдар Оспаналиев/ - Оңтүстік Қазақстан облысының Мақтаарал ауданында жасалған қарақшылық әрекет әшкереленді. Оқиғаның мән-жайымен бүгін журналистермен болған брифингте Ішкі істер министрлігінің Тіл саясаты және ақпарат департаментінің бастығы Қуанышбек Жұманов таныстырды,
деп хабарлайды ҚазАқпарат.
Оның айтуынша, бетперде киген белгісіз біреулер аудандағы компаниялардың бірінің ғимаратына кіріп келіп, қару кезеніп, диспетчер мен есептегіш-операторды соққыға жыққан. Сөйтіп қарақшылар 1,5 миллион теңгені алып кеткен. «Кешенді жүргізілген іздеу шараларының барысында жергілікті 4 тұрғын ұсталып, олар өздері жасаған әрекеттерін мойындады. Осы уақытта олардың аймақтағы өзге де қылмыстарға қатыстылықтары тексерілуде», деді департамент бастығы.
Сондай-ақ оның мәліметтеріне қарағанда, Батыс Қазақстан облысына қарасты Ақсай ауданының полиция органдарына 9 жасар қыздың ата-анасы келіп, қыздарының мектепке кеткен соң қайта оралмағандығын айтып, шағымданған. «Тексеру жұмыстарының барысында анықталғанындай қыз бала осы күні мектепке мүлдем келмеген. Ал келесі күні, яғни сәуірдің 23-інде жергілікті 30 жасар азамат пен оның сыбайласы ұсталды. Олар ата-анасынан ақша талап ету мақсатында қызды Орал қаласындағы жалдамалы пәтерде ұстап отырыпты», деді департамент бастығы.
