Қызғалдақтар Түркістан топырағын түрлі-түсті «текеметке» айналдырды

ТҮРКІСТАН. ҚазАқпарат - Қызғалдақтар Түркістан топырағын түрлі түсті «текеметке» айналдырды, деп хабарлайды ҚазАқпарат тілшісі.

Түркістан облысының кей аймақтарында өскен қызғалдақтардан жерлер қызыл кілемдей кейіпке еніп жатыр. Әсіресе, «Батыс Еуропа - Батыс Қытай» көлік дәлізінің Ордасбасы ауданына қарасты бөлігінде жайқалып өскен қызғалдақтар көз қызықтырады. Ал, алдағы бірер аптада Түлкібас ауданына қарасты Шұбайқызыл шоқысында да қызғалдақтар гүлдеп, аумаққа әсем көрініс сыйлайды.

«Қазақстанда кездесетін 38 түрлі қызғалдақтың 18-і қызыл кітапқа енген. Соның ішіндегі грейг, кауфман қызғалдақтары Түлкібас, Ордабасы, Бәйдібек аудандарының аумағында кездесіп жатыр. Мұнан бөлек, жақын арада жабайы қызғалдақтарда өсіп шығады. Жалпы, өңірде қызғалдақ алқабы жылдан жылға көбейіп келеді» - дейді Түркістан олысы орман шаруашылығы және жануарлар дүниесі аумақтық инспекциясының бөлім басшысы Нұрдәулет Оразымбетов.

Бүгінде тәртіп сақшылары мен орман шаруашылығының мамандары бірлесіп, алқаптарда өсіп тұрған қызғалдақтарды қорғау жұмыстарын атқаруда. Әсіресе, қызықтауға келген азаматтарға қызғалдақты жұлуға болмайтындығын түсіндіріп жатыр.

Айта кетейік, бұдан алдын қызғалдақ жұлғандардың әрекеті әлеуметтік желіде тараған болатын. Әзірге, Түркістан полициясы олардың жеке басын анықтап жатыр.