Қызылорда: Ауыл арасында адам қаққан жүргізушіге іздеу жарияланды
ҚЫЗЫЛОРДА. ҚазАқпарат - Қызылорда облысында екі ауыл арасындағы жолда көлігімен адамды қағып кетіп, бой тасалаған жүргізушіге іздеу жарияланды, деп хабарлайды ҚазАқпарат тілшісі.
Облыстық Ішкі істер департаментінің баспасөз қызметінен мәлім еткендей, оқиға үстіміздегі жылы наурыздың 9-ынан 10-ына қараған түні Жаңақорған ауданындағы Жаңарық пен Байкенже ауылдары арасында болды. Адам өліміне алып келген апатқа кінәлі жүргізушінің аты-жөні белгісіз. Ол тізгіндеген автокөліктің маркасы да анықталмаған.
Қызылорда облыстық ІІД аталмыш жол-көлік оқиғасына қатысты қандай да бір мәліметке ие азаматтарды Ішкі істер департаментіне немесе Жаңақорған аудандық ішкі істер бөліміне хабарласуды сұрайды. Ақпараттың құпиялылығына кепілдік беріледі.
«Айта кетейік, ҚР Кылмыстық кодексінің 53-бабына сәйкес, кінәлі тұлға өз айыбын мойындап келуі - қылмыстық жауаптылықты жеңілдететін мән-жайлар болып табылады», - делінген хабарламада.
Әділет Қаңтарбаев.
