Қызылорда қаласында 100-ге жуық көше жөндеуден өтуде

ҚЫЗЫЛОРДА. Қыркүйектің 4-і. ҚазАқпарат (Руслан Игілік) -  Қызылорда қаласында 100-ге жуық көшелер "Жол картасы"  бойынша жөндеуден өткізілуде,

деп хабарлайды ҚазАқпарат тілшісі.

Облыс әкімі Бо­лат­бек Қуандықовтың төрағалығымен өткен мәжілісте облыс орта­лығындағы жолдарды жөндеу жұмыстарының барысы сарапталды. Қала әкімінің орынбасары Қалмырза Иманбаевтың айтуынша, жол жөн­деу жұмыстарының негізгі бөлігі қыркүйек айының 20-на дейін толық аяқ­талады. Қазір жөндеуге жатқызылған 46 көшенің 30-ында жұмыс толықтай орындалып бітті. Сонымен қатар, 11 көшеде жөндеу жұмыстары аяқталуға таяп қалса, 5 көшені жөндеуге дайындық жұмыстары басталып кетті. Одан өзге орташа жөндеу жұмыстары жасалып жатқан 16 көшедегі жұмыстың басым бөлігі еңсеріліп қалды. Жыл басында қала бойынша барлығы 98 көше жөнделеді деп жоспар­лан­ған еді.  Дегенмен үнем­делген қаржыға қосымша тағы 4 көше реттелетін болды.