Қызылорда облысында сыбайлас жемқорлыққа қарсы күрес бағытында нақты жұмыстар жүруде

ҚЫЗЫЛОРДА. Қыркүйектің 8-і. ҚазАқпарат (Руслан Игілік) - Қызылорда облысында биылғы жылдың  сегіз айында аймақтағы құқық қорғау органдары барлығы 29 сыбайлас жемқорлық сипатындағы қылмыстың бетін ашты,

деп хабарлайды ҚазАқпарат тілшісі.

Бұл өткен жылмен салыстырғанда 20,8 пайызға артық. Олардың ішінде 20 адамға қатысты 19 қылмыстық іс қозғалды. Облыста тіркелген қылмыстардың көпшілігі Қызылорда қаласында орын алған. Олардың біршама бөлігі облыстық экономикалық қылмысқа және сыбайлас жемқорлыққа қарсы күрес департаменті қызметкерлерінің күшімен анықталған.

Оған қоса, барлығы 114 лауазымды тұлға сыбайлас жемқорлық сипатындағы әртүрлі құқық бұзушылықтарды жасағаны үшін тәртіптік жауапкершілікке тартылды. Осы құқық бұзу­шы­лықтарды жасаушылардың 6-уы әкімдер, 5-еуі денсаулық сақтау, 37-сі білім беру, 6-уы ішкі істер, 1-еуі әділет органы, 58-і басқа да мемлекеттік органдар қызметкерлері болып табылады.