Қызылордада 70 жастағы батыр ананың жүрегіне ота жасалды
ҚЫЗЫЛОРДА. ҚазАқпарат - Қызылордада 70 жастағы батыр ананың жүрегіне ота жасалды, - деп хабарлады облыстық денсаулық сақтау басқармасының баспасөз қызметі.
Науқас Үйтолған Бейсенғалиева туабітті жүрек ақауына шалдыққан. Жүрегінде тесік болған. Медицинада мұндай науқастарды 5-6 айлық кезден 5 жасқа дейінгі аралықта хирургиялық жолмен емдейді. Сырқатына қарамастан Үйтолған әже 10 баланы дүниеге әкелген. «Батыр ананың сыр бермей, аяқ басып жүргені - таңқаларлық жағдай», - дейді кардиолог мамандар.
Бірақ шөбере сүйген кейуананың кейінгі кезде ентігуі жиілепті. Соңғы кезде жүріп-тұруы қиындаған кезде ғана ол дәрігерлерге жүгінген. Облыстық медицина орталығы кардиология бөлімшесінің меңгерушісі Берік Дәуітбаев науқастың жағдай жақсы екенін бүгінде үйіне шығарылуға дайындалып жатқанын жеткізді.
