Қызылордада «Ағаш ексең аялап, басыңда болар саябақ» деген атпен көшелер арасында бәсеке болды
ҚЫЗЫЛОРДА. 25 сәуір. ҚазАқпарат /Жаңагүл Сердалы/ - Қызылордадағы Белкөл кентінде әкімдіктің ұйымдастыруымен «Ағаш ексең аялап, басыңда болар саябақ» деген атпен көшелер арасындағы бәсекенің екінші кезеңі болып өтті.
«Көшелер сайысының» мақсаты - кент тұрғындарының көше тазалығын сақтау арқылы тұрғылықты жердегі тазалыққа үлес қосуына қол жеткізу және халық арасында бұқаралық спортты дамыту, салауатты өмір салтын насихаттау болып табылады. Ол 3 кезеңнен тұрады. Сайыста 1 орынды - 2-ші желі, 2 орынды - Зеленая, 3 орынды М.Есмаханов көшелері иеленді.
Жалпы, биыл көктемгі екі айда 6 сенбілік өткізілді. Әр сенбілік сайын 200-250 адам сенбілікке шығып, кент көшелерінен орташа алғанда аптасына 7-12 текше метр қоқыстар шығарылып отырды. «Ибрайхан и К ЛТД» ЖШС барлық сенбілікте қоқыс тиейтін көліктермен қамтамасыз етті. Кент бойынша айына 62 текше метр, бүгінгі күнге дейін 240 текше метр тұрмыстық қатты қалдықтар арнайы полигонға шығарылды.
