Қызылордада әскери қызметшінің қаза табу себептері анықталды
АСТАНА. ҚазАқпарат - ҚР Қорғаныс министрлігі келісімшартпен жұмыс істеп жүрген әскери қызметшінің мерт болу себептерін айтып берді, деп хабарлайды ҚазАқпарат тілшісі.
«2018 жылдың 23 қаңтарында 66597 әскери бөлімінің материалдық-техникалық жабдықтау ротасының аға маманы (аспаз), келісімшартпен қызмет етіп жүрген қатардағы жауынгер Есмағамбетов Р.К. «Сырдария» полигонында ЦВ-1,2 (салмағы 900 кг) цистернасын өз бетімен тасымалдау барысында көкірек қуысынан жарақат алған.Ол жедел жәрдем көлігімен жеткізілген Қызылорда қаласындағы облыстық медициналық орталықта көз жұмды», - деп жауап берді мекеменің баспасөз қызметі ҚазАқпарат тілшісіне.
Қорғаныс министрлігінің хабарлауынша, қатардағы жауынгердің өліміне қатысты Қызылорда гарнизонының құқық қорғау органдары тергеуге дейінгі тексеру жұмыстарын жүргізіп жатыр.
«ҚР ҚК 453-бабы, 2-бөлімінде (Қайғылы оқиғаға әкеп соққан қызметке салғырт қарау) көрсетілген қылмыстық құқық бұзушылық белгілері бойынша аталған іс сотқа дейінгі бірыңғай тергеу реестріне тіркелді», - деп атап өтті баспасөз қызметі.
