Қызылордада күзет қызметкерінің киімін заңсыз киген 3 азамат жауапқа тартылды
ҚЫЗЫЛОРДА.ҚазАқпарат-Мемлекет басшысы 2016 жылдың 22 желтоқсанында «Қазақстан Республикасының кейбір заңнамалық актілеріне экстремизмге және терроризмге қарсы іс-қимыл мәселелері бойынша өзгерістер мен толықтырулар енгізу туралы» заңына қол қойып, соның негізінде Әкімшілік құқық бұзушылық туралы кодексіне және «Күзет қызметі туралы» заңға өзгерістер енгізілген болатын. Бұл туралы ҚазАқпарат ХАА тілшісі.
Атап айтқанда, ӘҚБтК-нің 675-бабында жеке күзет ұйымының күзетші лауазымын атқаратын жұмысшының арнаулы киімін оған құқығы жоқ адамдардың заңсыз киіп жүргені (пайдалану) үшін жеке адамдарға әкімшілік-құқықтық ықпал ету шарасы көзделетіндігі көрсетілген.
Заң талабын іске асыру мақсатында жыл басынан бері Қызылорда ОІІД Күзет қызметін бақылау бөлімі мен аймақтық полиция инспекторлары бірлесіп күзет ұйымы қызметкерлері арасында түсіндіру жұмыстарын жүргізіп, заң талаптарына бағынбаған жағдайда қоданылатын жауапкершілік жайын түсіндірді.
Дегенмен, тиісті тексеріс жұмыстары барысында заңбұзушылыққа жол берген азаматтар да анықталды. Атап айтқанда, мемлекеттік емес ұйымдарда қарауыл болып жұмыс атқаратын Қызылорда қаласының үш тұрғыны күзетшілерге тиесілі «КҮЗЕТ» деген жазуы бар арнайы нысанды киімін киіп жүргені үшін әкімшілік жауапкершілікке тартылды.
Оларға қатысты ҚР ӘҚБтК-нің 675-бабы 3-бөлігіне сәйкес хаттама толтырылып, 5 айлық есептік көрсеткіш көлемінде айыппұл салынды. ОІІД Күзет қызметін бақылау бөлімімен арнайы нысандық киім кию тәртібін бұзған азаматтарды жауапкершілікке тарту бағытында жұмыстар жалғасатын болады.
