Қызылордадағы бильбордтарға ҰОС батырларының суреттері қойылды
ҚЫЗЫЛОРДА. ҚазАқпарат - 9 мамыр қарсаңында Қызылорда қаласында Жеңіс күнін жақындатқан батырлар, атап айтқанда Сыр бойынан шыққан Кеңес Одағының Батырлары насихатталуда.
Қаланың орталық Жібек жолы көшесінде батырлардың суреті мен аты-жөні жазылған насихаттық билбордтар орналастырылып, бүгінгі жас ұрпаққа таныстырылуда. Бұл туралы қалалық ішкі саясат бөлімінің басшысы Балдырған Мәмен хабарлады.
Айта кету керек, Қызылорда облысынан 20 Кеңес Одағының батыры, 1 «Даңқ» орденінің толық иегері шыққан. Қазір Қызылорда қаласында барлығы 54 Ұлы Отан соғысының ардагері бар. Оның 19-ы - ҰОС мүгедегі, 35-і - ҰОС қатысушылары.
Соғыс және еңбек ардагерлеріне әлеуметтік қолдаулар жалғасын табуда. Бұл мақсатқа жергілікті бюджеттен бір жолғы көмек ретінде барлығы 185,0 млн теңге бөлінді.
Сондай-ақ, Жеңіс мерекесі қарсаңында қаладағы «Тағзым алаңы» қайта жаңғыртудан өтті.
