Қызылордадағы орталық мешітте қайырымдылық шарасы жасалды

ҚЫЗЫЛОРДА. Қыркүйектің 9-ы. ҚазАқпарат /Жаңагүл Сердалы/ - Бүгін Қызылордадағы «Сырдария-Ақмешіт» мешітінде Айт намазынан кейін «Сыр мейірімі» имандылық-қайырымдылық шарасы ұйымдастырылды. Оған облыс әкімі Болатбек Қуандықов пен Жалаңтөс Баһадүрге арналған республикалық ғылыми-тәжірибелік конференцияға келген қонақтар қатысты.

Акция барысында «Жас жеткіншіктерді әлеуметтік бейімдеу» орталығы мен патронаттық тәрбиеленушілерден 20 адамға қайырымдылық көмек көрсетілді. «Жалаңтөс Баһадүр» қоғамдық қорынан мұқтаж жандарға 250 мың теңге көлемінде сый-сияпат жасалды.

Шара барысында «Жол картасы» бағдарламасы аясында оқуға түскен «Болашақ» колледжінің «Көліктік радиоэлектрондық жабдықтарды техникалық пайдалану» бөлімшесінің студенті Нұргүл Дүмекова акцияны ұйымдастырушыларға өз алғысын білдірді.

Акция соңында ҚР Парламенті Мәжілісінің депутаты, академик Кенжеғали Сағадиев акцияға қатысқан 5 тәрбиеленушіні өз қаржысы есебінен Алматы қаласына оқытатынын айтты. Ал тұрмысы төмен отбасыларын қолдау жөніндегі аймақтық қордың төрайымы Сапура Әбдірахманова жағдайы төмен отбастарына үй тұрмысына керекті кілем, ыдыс-аяқ тапсырды.