Латвия Президенті Қарағанды облысына келеді
ҚАРАҒАНДЫ. 2 маусым. ҚазАқпарат -Қазақстанға ресми сапармен келе жатқан Латвия Президенті Андрис Берзиньш бүгін Қарағанды облысына аялдайды, деп хабарлады аймақ әкімінің баспасөз қызметінен.
«Латвия Президенті А. Берзиньш Спасск мемориалды кешенінде қуғын-сүргін құрбаны атанған латыштарға арналған ескерткішті ашады», - деп атап өтті облыс әкімінің баспасөз қызметінде.
Ескерткішті әзірлеуге Қазақстандағы Латвия елшілігі, Латвияның саяси қуғын-сүргін құрбандары қоғамы, «Латвияс дзелзцельш» және «Латвияс пастс» қатысты. Ескерткіш авторы - мүсінші Паулс Яунземс. Қолда бар мәліметтер бойынша, Спасскідегі лагерьде 1931 бен 1959 жылдар аралығында 1074 латыш болған.
Бұған дейін хабарланғандай, Латвия Президенті А. Берзиньш 2-4 маусым аралығында Қазақстанға ресми сапармен келеді. Сапар барысында жоғары деңгейде саясат пен экономикадағы ынтымақтастықты кеңейту, сондай-ақ солтүстік көлік желісін одан әрі дамыту мәселелері талықаланады. 3 маусым күні А. Берзиньштің Қазақстан Президенті Нұрсұлтан Назарбаевпен кездесуі жоспарланған. Сондай-ақ ол ҚР Премьер-Министрі Серік Ахметовпен және ҚР Парламенті Мәжілісінің төрағасы Нұрлан Нығматулинмен кездеседі.
Бұдан өзге, А. Берзиньш латвиялық-қазақстандық бизнес-форумға қатысады деп күтілуде. Оның мақсаты жобаларды жүзеге асыру үшін екі ел кәсіпкерлерінің арасында тікелей байланыс орнату.
