Лхоцзе шыңын бағындыру кезінде қазақстандық экспедицияның мүшесі Сергей Самойлов қаза тапты

АЛМАТЫ. Мамырдың 28-і. ҚазАқпарат - Еліміздің альпинизм құрамасының бас жаттықтырушысы Ерванд Ильинскийден қайғылы хабар түсті. Мамырдың 26-сында Лхоцзе шыңын бағындыру кезінде қазақстандық экспедицияның мүшесі Сергей Самойлов қаза тапты,

деп хабарлайды ҚазАқпарат республикалық Альпинизм және шыңға өрмелеу федерациясының баспасөз қызметіне сілтеме жасап. Ағымдағы жылы наурыздың 28-інде біздің экспедицияның Непалға аттанып, сол жақтан Лхоцзе шыңына сапар бастағанын ҚазАқпарат бұдан бұрын хабарлаған болатын. Лхоцзе - биіктігі 8 мың метрден асатын әлемдегі 14 шыңның соңғысы. Қазақстандық альпинистер 13 шыңды бағындырып қойған болатын. Лхоцзенің биіктігі ? 8 545 метр. Қазақстандық команданың құрамында жеті тәжірибелі альпинист - Василий Пивцов, Сергей Самойлов, Артем Скопин, Александр Рудаков, Евгений Шутов, Александр Софрыгин және команда капитаны Мақсұт Жұмаев кірді. Экспедиция мамырдың 30-ында аяқталуы тиіс болатын.