LRT: Сығанақ көшесіндегі көлік қозғалысы 25 желтоқсаннан бастап қалпына келеді
LRT желісінің жобасын іске асыру аясында Сығанақ көшесінің бойында Сауран мен Ақмешіт көшелерінің қиылысында монолитті темірбетон балкаларын орнату жұмысы аяқталды, деп хабарлайды Kazinform елорда әкімдігінің ресми сайтына сілтеме жасап.
Осыған байланысты, 25 желтоқсаннан бастап Сығанақ көшесінің бойымен, Қабанбай батыр даңғылынан «Арыс» көпіріне дейінгі (оңтүстік жағы) қозғалыс толығымен қалпына келтіріледі. Қозғалыс әкімшілік полиция басқармасымен келісілген жол қозғалысын ұйымдастыру сызбасына сәйкес жүзеге асырылады.
Айта кетейік, эстакаданың құрылыс жұмыстарын жүргізуге байланысты, 25 тамыздан бастап Сығанақ көшесінің бойымен, Қабанбай батыр даңғылынан Түркістан көшесіне дейінгі (оңтүстік жағы) қозғалысқа толығымен, Сығанақ көшесінің бойымен Түркістан көшесінен Қабанбай батыр даңғылына дейінгі учаскеде (солтүстік жағы) ішінара шектеу (екі жолақ) енгізілген болатын.
Қазіргі уақытта, аталған учаскеде уақытша конструкцияларды бұзу және учаскені тазалау жүргізіліп жатыр.
«Көлік жүргізушілері қиылыстардан бұрылу кезінде өзгерістерге назар аударуды және сапарларын жоспарлау кезінде осы ақпаратты ескеруді сұраймыз», - делінген хабарламада.
