Мәдениет министрлігі «Әл-Фараби жолымен» халықаралық экспедициясын ұйымдастырады
НҰР-СҰЛТАН. ҚазАқпарат – Әбу Насыр әл-Фарабидің 1 150 жылдығы аясында Мәдениет және спорт министрлігі «Ұстаздың оралуы» деректі фильмін түсіріп, еліміздің барлық музейі мен кітапханасында тақырыптық көрме өткізуді жоспарлап отыр, деп хабарладйы ҚазАқпарат тілшісі.
«Күні кеше Алматы қаласында «Әлемнің екінші ұстазы» Әбу Насыр әл-Фараби бабамыздың 1 150 жылдық мерейтойын бастаудың рәсімі халықаралық деңгейде өтті. Қазақ ұлттық университетінде «Әбу Насыр әл-Фараби атындағы орталық» ашылды. Бұл ретте биылғы жылы атап өтетін маңызды іс-шаралар барысында ысырапшылдық пен науқаншылдыққа жол берілмейтіндігіне баса назар аударғым келеді», - деді Мәдениет және спорт министрі Ақтоты Райымқұлова министрліктің кеңейтілген алқа отырысында.
Министр сондай-ақ, «Әл-Фараби жолымен» халықаралық экспедициясын ұйымдастыру, Сириядағы Дамаск қаласында орналасқан «Әл-Фараби» кесенесінің макеттік көшірмесін Түркістан облысындағы Отырар музей-қорығының аумағында орнату мәселесі қосымша пысықталып жатқанын айтып өтті. Бұдан бөлек ғалым туған Оқсыз қалашығының археологиялық және ғылыми зерттеу жоспарланып отыр.
