Макгрегор-Мейвезер айқасына 3360 гауһар тасты белбеу әзірленді
АСТАНА. ҚазАқпарат - Дүниежүзілік бокс кеңесі (WBC) америкалық боксшы Флойд Мейвезер мен ирландиялық ММА шебері Конор Макгрегор арасындағы жекпе-жек жеңімпазына арналған арнайы құрмет сыйлығын әзірледі.
Ұйымның ресми сайтының хабарлауынша, «бағалы белбеудің» әзірленуіне бір жарым келі 24 қаратты алтын, сондай-ақ 3360 гауһар тас, 600 жақұт және 160 зүмірет тас қолданылған. Белбеудің өзі қолтырауын терісінен әзірленіп, жасыл түске боялған.
Бұл Флойд Мейвезердің қатысуымен өтетін айқасқа дайындалып тұрған алғашқы арнайы марапат емес. Филиппиндік Мэнни Пакьяоға қарсы жекпе-жектегі жеңісінен кейін америкалық боксшы 1 миллион доллар тұратын «зүбәржат белбеу» иеленген болатын.
