Максим Богатырёв Аргентинада параканоэден 2 дүркін әлем чемпионы атанды
АСТАНА. KAZINFORM — Аргентинаның Гуалегуайчу қаласында өтіп жатқан байдарка мен каноэде ескек есу марафонынан және параканоэден әлем чемпионатында Қазақстан қоржынына екінші алтын медаль түсті. Бұл туралы ескек есу спорты түрлерінен Ұлттық федерацияның баспасөз қызметі хабарлайды.
Бұл жолы отандасымыз Максим Богатырёв пара байдаркадан KL1 санатында мәреге бірінші жетті. Ұлттық құрама спортшысының 8 шақырым 200 метр қашықтықтағы уақыт көрсеткіші 48 минут, 05.34 секунд. Күміс жүлде жарыс қожайыны Диего Хорхенің еншісінде.
Бұл Максимнің осы жарыстағы екінші алтыны. Ол жарыстың алғашқы күні параканоэде топ жарған.
Айта кетейік, әлемдік додаға 38 елден 683 спортшы қатысып жатыр. Барлығы параканоэден 14 бағдарламада жүлде сарапқа салынады. Параканоэден чемпионат 25 қазанда аяқталады.
Бұған дейін Азия Пара ойындарында Қазақстан 50 медаль жеңіп алып, үздік ондыққа енгенін жаздық.
