Малайзия билігі Түркияға Гүленнің 3 жақтасын ұстап берді
АСТАНА. ҚазАқпарат - Малайзия билігі Түркияға «Фетхуллахшылар террористік ұйымына» қатысы бар деген күдікпен 3 адамды ұстап берді. Бұл туралы Түркия Сыртқы істер министрі Мевлют Чавушоглының мәлімдесіне сілтеме жасап, Анатолия агенттігі хабарлады деп жазды Ресейдің ТАСС агенттігі.
Агенттік мәліметтеріне қарағанда, күдіктілерді Түркия тарапына беру туралы келісім өткен аптада Чавушоглының Малайзия премьер-министрі Наджиб Разакпен болған кездесуінде жасалды.
«Олар екіжақты келісімдерден соң үш адамды ұстап берді»,-деп келтірді Түркия сыртқы істер министрінің сөзін агенттік.
Чавушоглы ФЕТО-мен күресті жалғастыра беретінін айтады.
«Біздің олармен күресіміз ел ішінде елден жырақта да жалғаса береді. Біз олардың басқан іздерін аңдимыз»,-деді ол.
Анкара 1999 жылдан бері АҚШ-та тұрып жатқан Гүлен мен оның жақтастарын 15- шілде күні Түркияда болған мемлекеттік төңкеріс жасауға ұмтылу әрекеттеріне қатысы бар деп айыптайды. Ол кезде бүлікті бір топ жауынгерлер мен сардарлар ұйымдастырып, 246 адам мерт болып, 2 мынан астам адам жарақат алған болатын.
