«Манчестер Юнайтед» пен «Тоттенхэм» жанкүйерлері Еуропа лигасының финалы алдында төбелесті
АСТАНА. KAZINFORM — Испанияның Бильбао қаласынан 80 шақырым жерде орналасқан Сан-Себастьян қаласында «Манчестер Юнайтед» пен «Тоттенхэм» футбол командаларының жанкүйерлері қақтығысты.
Daily Mail газетінің хабарлауынша, Испанияның Сан-Себастьян қаласына матч көруге екі команданың жалпы саны 80 мыңға жуық ағылшын жанкүйері ұшып келген.
Бұл ойын қазіргі уақытта Ағылшын Премьер-Лигасында сәйкесінше 16 және 17-орындарда тұрған екі клуб маусымының шешуші сәті болады.
Кездесу жеңімпазы кубокты алып қана қоймай, келесі маусымда Чемпиондар лигасына қатысу мүмкіндігін алады.
Матч сондай-ақ өз командаларының кубок көтергенін көргісі келетін жанкүйерлер үшін де маңызды. Бұл «Тоттенхэмнің» 17 жылдағы алғашқы олжасы болуы мүмкін, ал «Манчестер Юнайтед» португалдық жаттықтырушы Рубен Аморимнің жетекшілігімен бірінші жеңіске үміттеніп отыр.
Алайда ойын қарсаңында жағдай шиеленісе түсті. Сейсенбі күні кешке тәртіпсіздік басталды. Испанияның Бильбао қаласынан 80 шақырым жерде орналасқан Сан-Себастьян қаласында «Манчестер Юнайтед» пен «Тоттенхэм» жанкүйерлері қақтығысты.
Испаниялық El Diario Vasco басылымының хабарлауынша, жағдай жергілікті уақыт бойынша сағат 21:20 шамасында ушығып кеткен. Куәгерлердің айтуынша, бәрі айғай мен балағаттаудан басталған, сосын бір жанкүйер соққы алып жерге құлаған.
Осыдан кейін бірнеше адам түрлі заттарды лақтыра бастады, үстелдер төңкерілді. Оқиға орнына жеткен полицейлер кезекшілікке қалды. Тәртіп сақшылары келгенде жағдай біртіндеп тұрақтала бастады. Ұсталғандар, ауыр зардап шеккендер жоқ.
Сондай-ақ оқиға орнына жедел жәрдем шақырылғаны, бірақ зардап шеккендерге ауруханаға жатқызу қажет болмағаны хабарланды.
53 мыңға жуық адам сыйғызатын «Сан-Мамес» стадионында өтетін финалға екі командаға 15 мың билеттен бөлінді. Алайда мыңдаған жанкүйер билетті стадионның басқа бөлімдерінен сатып алып жатқаны, көбі қалаға билетсіз келетіні хабарланды.
Бұған дейін хабарланғандай, Манчестер Юнайтед 100 мың адамдық жаңа стадион салмақшы.
