Маңғыстауда 7 мыңнан астам мүмкіндігі шектеулі адамның құқығы бұзылған
Маңғыстауда биыл 7 мыңнан астам мүмкіндігі шектеулі адамның құқығы бұзылған. Әсіресе инватакси қызметінде заңбұзушылықтар көбірек тіркелген, деп хабарлайды Kazinform.
Инватакси қызметі заң бойынша үзіліссіз, демалыс және мереке күндері жұмыс істеуі тиіс болса, олар тек 8 сағат қызмет көрсеткен. Сондай-ақ мүгедектігі бар 3 мыңнан астам адам оңалту-сауықтыру шараларынан шет қалған. Өйткені, жауапты мекеме 66 млн теңге қаржыны тиісті мақсатта жұмсамай, ұстап отырған. 100-ге жуық мүгедек медициналық тексеруден қайта өтуге мәжбүр болған. Бұған дәрігерлердің тиісті құжаттарды дұрыс толтырмауы себеп болған.
Қаладағы әлеуметтік нысандардың 100-ден астамы мүгедектігі бар адамдар үшін талапқа сай емес. Нәтижесінде жауапты тұлғаларға 7,5 млн теңге айыппұл салынған.
- Облыс аумағындағы инфрақұрылым объектілері тиісті талаптарға сәйкес емес екені анықталды. Олардың басшылары қадағалау актісімен 7,5 млн теңге төлеу бойынша әкімшілік жауаптылыққа тартылды. Прокурорлық қадағалау актісімен жартысынан көбі талаптарға сәйкестендірілді, - деді Маңғыстау облыстық прокуратурасының басқарма басшысы Мерген Меңдіғалиев.
