Маңғыстауда Құлалы аралынан 30-дан астам өлген итбалық табылды
АҚТАУ. KAZINFORM – Бұл туралы «Qazaq balyk» Республикалық балық шаруашылығы және аквамәдениет қауымдастығының Маңғыстау облысы бойынша филиалының директоры Данияр Әкімжанов хабарлады. Табиғат жанашыры әрі, волонтер мамандарды шақырып, Құлалы аралында мониторинг жұмыстарын ұйымдастырған.
Мониторингке құзырлы орган өкілдері мен гидробиология және экология институтының мамандары қатысқан. Олар жағалаудың бірнеше шақырымын жаяу жүріп өтіп, нәтижесінде 37 итбалық өлексесін тапқан. Оның ішінде 7 итбалықтан тиісті сынамалар алынған.
Мониторинг жұмыстарына 2 шағын көлемді кеме және ҰҚК Шекара қызметі Маңғыстау облыстық департаменті жағалау күзетінің 2-дивизионына қарасты жылдам жүретін катер жұмылдырылған.
Бұған дейін, Маңғыстауда теңіз жағалауынан 200-ге жуық итбалық өлексесі табылғанын жазған болатынбыз.
