Маңғыстауда оқыстан болған жол апатынан екі адам көз жұмды

Маңғыстау облысында жол апатынан бірнеше адам зардап шегіп, екеуі қайтыс болды, деп хабарлайды Kazinform.

Қайғылы оқиға кеше түнде Жаңаөзен-Ақтау тасжолында болған. Бұл туралы өңірдің полиция департаменті мәлімдеді.

«9 қаңтар күні сағат 22:20 шамасында 102 кезекші пультіне Жаңаөзен-Ақтау тас жолының 34/193 шақырымында орын алған жол-көлік оқиғасы туралы шақырту келіп түсті. Mitsubishi Lancer автокөлігінің жүргізушісі Toyota Avalon көлігімен соқтығысқан. Апат салдарынан оқиға орнында алған жарақаттардан Mitsubishi автокөлігінің 69 жастағы жүргізушісі қайтыс болды және Toyota автокөлігінің 48 жастағы жолаушысы ауруханаға барар жолда жедел жәрдем көлігінде қаза тапты. Сонымен қатар зардап шеккен бес адам Жаңаөзен қаласының ауруханасына жеткізілді», - деді Маңғыстау облыстық полиция департаментінің баспасөз қызметі.

Қазір аталған дерек бойынша Қылмыстық кодекстің 45-бабы 4-бөлігі бойынша Қарақия аудандық полиция бөлімінде СДТТБТ-де тіркелді. Сот-медициналық сараптама тағайындалып, тергеу амалдары жүргізіліп жатыр. Өзге ақпарат тергеу мүддесі үшін жария етілмейтіні белгілі болды.