Маңғыстаулық велоспортшылар ел чемпионы атанды
АҚТАУ. KAZINFORM – Астана қаласында велотректен ерлер және әйелдер арасында өткен қысқы ел біріншілігінде Дмитрий Носков пен Сергей Пономарёв ҚР чемпиондары атанды.
Маңғыстау облыстық спорт басқармасы 6-11 ақпан аралығында Астана қаласында велотректен ерлер және әйелдер арасында қысқы ел чемпионатында маңғыстаулықтар 2 алтын, 2 күміс, 2 қола жүлде иеленгенін мәлімдеді. Біріншілікке еліміздің 16 облыстан 225 спортшы бақ сынады.
Олардың қатарында командалық уақытқа жарысқа шыққан Дмитрий Носков 1-орын, Сергей Пономарёв кейрин бағдарламасы бойынша 1-орын, Рамазан Мұхтар гит 1000 метр бағдарламасы бойынша 2-орын иеленді. Қола жүлдеге кейрин бағдарламасында бақ сынаған Виктор Голов пен спринт бағдарламасында Рамазан Мұхтар қол жеткізді.
Сондай-ақ, маңғыстаулық спортшылар Виктор Голов, Рамазан Мұхтар, Сергей Пономарёв командалық спринт бағдарламасында өнер көрсетіп күміс медаль иегері атанды.
«2024 жылдың бірінші жарысын ойдағыдай бастадық. Кейрин жарысын ұту біз үшін маңызды болды, себебі бұл - Парижде өтетін 2024 Олимпиада ойындарына іріктеу кезендерінің бірі. Рамазан Мұхтар, Дмитрий Носков, Сергей Пономарёв 21-26 ақпанда Үндістан мемлекетінде өтетін Азия Чемпионатына жолдама ұтып алып, Ұлттық құрама сапында өнер көрсетеді. Олимпиадалық лицензия ұтып алуға көмектесетін біз үшін маңызды ұпайлар осы Азия Чемпионатында сарапқа салынады» - деді велоспорттан облыстың аға жаттықтырушысы Жанұя Сейітова.
Қазақстан чемпионатының қорытындысы бойынша маңғыстаулық велошабандоздар ерлер арасында өңір құрамасы командалық 2-орынға тұрақтады. 15-16 жас аралығында ұлдар және жасөспірім қыздар ел біріншілігі мен велоспорттан республикалық жарыста бақ сынап, маңғыстаулық Әділхан Шамыран скретч бағдарламасында күміс жүлдегер атанды.
