Маңғыстау облысында аяздан канал қатып қалып, көпқабатты үйлерге су тасымалданып жатыр

АҚТАУ. ҚазАқпарат – Маңғыстау облысының Мұнайлы ауданында су жинау каналы аяз салдарынан қатып қалып, көпқабатты үйлерге ауызсу беру көлемі азайтылды. Тұрғындарға су көлікпен тасымалданып жатыр, деп хабарлайды ҚазАқпарат тілшісі.

«Қыс мезгілінде ауданға сағатына 400 текше метр су жіберіледі. Ауа райының күрт өзгеруіне байланысты су көлемі сағатына 100 текше метрге азайтылды.

Оның негізгі себебі - «Маэк» ЖШС аумағында орналасқан су жинау каналының қатып қалуы. Бізге каналдан су келеді, оны тұщытып, аудандарға жібереміз. Алайда, келетін су көлемі азайғандықтан, аудандарға суды бұрынғы көлемде әзірге бере алмаймыз», - деді «Каспий су тұщыту» зауытының директоры Бақыт Шапқан.

«Маэк» ЖШС хабарлауынша, диаметрі 500 мм болатын ЖЭО-1 құбырының қатып қалған аумағын жібіту жұмыстары жүргізіліп жатыр.

Айта кетейік, Мұнайлы ауданындағы көпқабатты 10-нан астам үй тұрғынынан шағым түсті. Олар су ағысының азайғанын айтты. Қазіргі таңда көпқабатты үйлерге су таситын 5 көлік қосымша тегін су жеткізіп жатыр.

Мұнайлы ауданы әкімдігі көпқабатты үйлерге су бүгін кешке қалыпты жағдайда беріле бастайды.