Маңғыстау облысында оқушылар саны бес жылда 38 мыңға артқан
АҚТАУ.ҚазАқпарат – Маңғыстау облысында соңғы 5 жылда оқушылар саны 38 мыңға артқан. Бұл туралы Ақтауда өткен педагогтердің тамыз кеңесінде айтылды, деп хабарлайды ҚазАқпарат тілшісі.
Өңірде оқушы саны артқан. 3 ауысымды оқуды жою мақсатында биыл облыста 2 мектеп пайдалануға берілмек.
«Жыл соңына дейін екі мектеп, жапсарластыра салынған екі ғимарат пайдалануға беріледі. Сонымен қатар осы жылы 11 жекеменшік мектеп ашылады», - деді конференцияда Маңғыстау облысы әкімінің орынбасары Ұлықбек Тналиев.
Биыл өңірдегі 21 мектепке жөндеу жүргізіліп, жаңа мотификациялық кабинеттермен жабдықталған. Сондай-ақ бес мың орындық бес мектептің құрылысы жүріп жатыр. Ал 2023-2025 жылдары өңірде 27 мектеп бой көтереді. Оған қоса мемлекеттік «Жайлы мектеп» жобасы аясында тағы 9 білім ордасын тұрғызу жоспарланған.
Мәлім болғандай, қолдауды қажет ететін 35 мың оқушыға Жалпы міндетті білім қорынан 1 млрд 400 млн теңге қарастырылған. Сонымен қатар «Мектепке жол» акциясы аясында өңір кәсіпкерлері 15 мыңнан астам оқушыға көмек көрсетті.
