Маңғыстауда 20 мыңнан аса оқушы жаңа оқу жылын бастады
АҚТАУ.ҚазАқпарат - Маңғыстауда 20 мыңнан астам білім алушы мектеп табалдырығын аттады, деп хабарлайды ҚазАқпарат тілшісі.
Алғашқы қоңырау соғылған білім ордалардың арасында Ақтау қаласында орналасқан №19 мектеп-гимназиясы бар. Биыл 3300-ге жуық оқушы қабылдаған мектеп мерекеге орай салтанатты шара өткізіп, балаларды құшақ жая қарсы алды.
«Өңірде 4 мектептің құрылысы жүріп жатыр. Мемлекет жас ұрпақтың жарқын болашағы үшін жан-жақты жағдай жасап жатыр. Елімізді сіздерге сеніп тапсырамыз, - деді Маңғыстау облысы әкімінің орынбасары Ұлықбек Тналиев.
Сондай-ақ, №19 мектеп-гимназиясына биылғы оқу жылында 350 оқушы 1-сыныпқа аяқ басты. Мектеп директоры Мадина Абзиеваның айтуынша, 100-ге жуық түлек оқу ордасынан ұшып шығады.
«№19 мектеп-гимназияның ашылғанына аз уақыт болса да үздік 5 мектептің қатарына кіріп отыр. Балаға дұрыс тәрбие беру үшін білім ордамызда 300-ге жуық ұстаз қызмет етеді. Біздің мақсат-ел игілігі жолында еңбек ететін білімді азаматтарды тәрбиелеу. Оларды білім нәрімен сусындату. Сол үшінде талпынып, барымызды салып келеміз», - деді Мадина Абзиева.
Аталған мектептің 10- сынып оқушысы Гүлсім Базар жаңа оқу жылынан үлкен үміт күтетінін айтады.
