Маңғыстауда алдағы бес жылда жол сапасы 99%-ға жақсарады
АҚТАУ. ҚазАқпарат - Бүгін «Amanat» партиясының облыстық мәслихат депутаттығына үміткерлер Нури Тумышев, Тимур Төкенұлы, Анар Шамшадинова, Раушан Аймұрзаева, Ирина Беляева «Қазақтеңізкөлікфлоты» ҰТКҚК» ЖШС ұжымымен кездесті, деп хабарлайды ҚазАқпарат.
Кездесуде Нури Лазaрұлы ұжымдағы қыз-келіншектерді 8 наурыз - аналар күнімен құттықтап, кейін партияның сайлауалды бағдарламасын түсіндірді.
Сайлауалды бағдарламада жол сапасы туралы да айтылды.
- Қазіргі уақытта жақсы және қанағаттанарлық жағдайдағы жергілікті маңызы бар жолдардың үлесі - 96%. Бұл ретте өңірдегі ауылішілік жолдардың 68,6 пайызы және қалалық жолдардың 23 пайызы қанағаттанарлықсыз жағдайда. Сондықтан партия автожолдардың сапасын жақсарту үшін 2027 жылға дейін бірқатар іс-шараларға ықпал етпек. Оның ішінде облыстық және аудандық маңызы бар 450 шақырым автомобиль жолын салу және реконструкциялау, ұзындығы 250 шақырымнан асатын облыстық және аудандық маңызы бар жолдарды орташа жөндеу, Жаңаөзен қаласында және Мұнайлы, Маңғыстау, Бейнеу аудандарында кемінде 600 шақырым ауылішілік және қалалық құрылыс, реконструкциялау және орташа жөндеу жұмыстары бар. Бұл шаралар 2027 жылға қарай жақсы және қанағаттанарлық жағдайдағы жергілікті маңызы бар жолдардың үлесін 96%-ан 99%-ға дейін ұлғайтуға мүмкіндік береді. Сондай-ақ қанағаттанарлықсыз жағдайдағы ауылішілік жолдар үлесін 68,6%-дан 59,3%-ға дейін және қалалық жолдар үлесін 23%-дан 13,6%-ға дейін төмендетеді, -деп атап өтті Анар Шамшадинова.
«Қазақтеңізкөлікфлоты» ҰТКҚК» ЖШС - Қазақстан бойынша ұлттық теңіз тасымалдаушы компания.
Компанияда бүгінгі күні танкерлер, сүйреткіштер, сонымен қатар ірі көлемді жүктерді тасымалдауға арналған кемелер және әртүрлі мақсаттарға көзделген баржалар бар.
Соған сәйкес, «Қазақтеңізкөлікфлоты» ҰТКҚК» ЖШС еліміздегі кеме қатынасының аса жоғары халықаралық қауіпсіздік және сапа стандарттарына сәйкес келетін аса тиімді және жоғары рентабельді компания.
Өңір үшін ғана емес, еліміз үшін аса маңызды компания ұжымы кездесуде сайлауалды бағдарламамен жан-жақты танысып, алдағы 5 жылда атқарылатын жұмыстарға оң бағасын берді және сайлауда дауыс беретінін жеткізді.
Маңғыстау облыстық мәслихаты депутаттарының сайлауында партиялық тізімді ұсынған «AMANAT» партиясы сайлау қорының қаражатынан төленді.
