Маңғыстауда созылмалы ауруы бар науқастарға 5 млрд 746 млн теңгеге дәрі-дәрмек алынды
АҚТАУ. ҚазАқпарат – Былтыр Маңғыстау облыстық денсаулық сақтау басқармасы Әлеуметтік медициналық сақтандыру қорына дәрі алу үшін 5 млрд 746 млн теңгеге өтінім жіберді. Нәтижесінде созылмалы аурулары бар науқастар препараттармен қамтамасыз етілді, деп хабарлайды ҚазАқпарат тілшісі.
«Қазір 2023 жылға өтініш қабылданып жатыр. Бірақ дәрілердің бір бөлігі бірыңғай дистрибьютор арқылы сатып алынды. Қалған дәрілерді күтіп отырмыз. Барлығы алынған соң облысқа жеткізілетін болады. 2021 жылы Шетпедегі 1 науқасқа дәрі алынып, облыстық көпбейінді ауруханада бірінші ампуласы салынды. Сонымен қатар Фабри ауруымен ауыратын, гормоналды препараттарды қолданатын науқастар да бар», - деді Маңғыстау облыстық денсаулық сақтау басқармасы дәрімен қамтамасыз ету бөлімінің бас маманы Жанар Төлебаева.
Дәрігерлердің айтуынша, амбулаторлық деңгейде тегін дәрі-дәрмек алу үшін науқас ең алдымен емханаға тіркеледі. Анализ тапсырып, ауруы расталғаннан кейін диспансерлік есепке тұруы керек. Оған қоса науқастың деректері тіркеу журналында болу қажет.
Ал егер тегін дәрі-дәрмек науқасқа берілмей жатса, 1439 қысқа нөмеріне тегін қоңырау шалып, толық ақпарат білуге болады.
