Маңғыстауға жол апатында көз жұмған өзбекстандықтардың туыстары келді
АСТАНА. ҚазАқпарат - Маңғыстауға Ақтау-Бейнеу жолында көлік апатынан қаза тапқандардың туыстары келді, деп хабарлайды lada.kz
Олар ДНҚ сараптамаға қатысады. Бұл туралы Өзбекстан Республикасының Төтенше жағдайлар жөніндегі министрлігінің өкілдері мәлім етті.
ӨР ТЖМ хабарлауынша, бүгін 2 наурызда марқұмдардың денесі елдеріне жеткізу жоспарланған.
«Марқұмдардың денелері әзірге Қазақстанда. Біздің өкілдер қазір сонда жүр. Туыстары ДНҚ сараптама жүргізу үшін шақыртылды», - деп мәлім етті Өзбекстан ТЖМ.
Еске сала кетсек, 1 наурызда Ақтау - Бейнеу автожолында, Маңғыстау ауданының Шетпе ауылы маңында жеңіл машина жүк көлікпен соқтығысқан болатын. Автомобиль өртеніп, оқиға орнында 7 адам қаза тапқан, соның алтауы Өзбекстан азаматы болған.
Жетінші жолаушының аты-жөні анықталып жатыр. Осы оқиғаға қатысты ҚР ҚК-нің 345 бабына сәйкес сотқа дейінгі тергеу жүргізілуде.
