Маңғыстауға жыл басынан бері 54 мыңнан астам турист келген
АҚТАУ. ҚазАқпарат – Жыл басынан бері Маңғыстау облысына 54 575 турист келген. Бұл туралы Маңғыстау облыстық туризм басқармасы мәлім етті, деп хабарлайды ҚазАқпарат тілшісі.
Басқарма ақпаратына қарағанда, биылғы 5 ай ішінде өңірге келген туристер саны былтырғымен салыстырғанда 2 мың адамға артық.
«Өңірде туристер тоқтайтын орындар саны 98-ге, ал қонақ үй нөмірлері 3 810-ға дейін ұлғайды. Жыл басынан 1,2 млрд теңгеге қызмет көрсетілді. Сонымен қатар, туризм саласына тартылған инвестиция көлемі артты. Мәселен, 2021 жылдың қорытындысы бойынша 43,8 млрд инвестиция тартылса, биыл қаңтар-сәуір аралығында бұл көрсеткіш 3,97 млрд теңгені құрады» делінген хабарламада.
Басқарманың ақпаратына сенсек, биыл Маңғыстауда 40 млрд-тан астам қаржыға 6 жобаны іске қосу жоспарланған.
Еске сала кетейік, елімізде турпакет шеңберінде саяхаттайтын 2-17 жас аралығындағы балаларға ұшақ билетін тегін алу ережелері жарияланды.
