Маңғыстаулық журналистер әскери теңізшілердің өмірімен танысты

АҚТАУ.ҚазАқпарат - Маңғыстаулық журналистер әскери теңізшілердің бір күнімен танысты. Баспасөз туры ҚР Әскери-теңіз күштерінің құрылғанына 30 жыл толуына орай ұйымдастырылды, деп хабарлайды ҚазАқпарат тілшісі.

Маңғыстаудағы Бұқаралық ақпарат құралдарының өкілдері бір күн бойы әскери теңізшілердің қасында болды.

Олар теңіз әскерлерінің өмірімен танысты. Сондай-ақ әртектә кемелер дивизионына барып матростармен, офицерлермен кездесті. Әскер қатарындағы теңізшілердің жағдайын көрді.

Кеме командирлері қонақтарды жауынгерлік кемелермен таныстырып, жатын жерлерін, ас үйін, офицерлер мен матростардың каюталарын, машиналардың бөлмесін көрсетті. Әскери теңізшілер қонақтарға түскі ас беруді де ұмытпады.

Одан соң әртекті кемелер дивизионы элементтерін пысықтай отырып, кемелерді орналастыру пунктін күзету және қорғау бойынша құраманың базалық жаттығуын көрді. Кемелердің су астына қарсы-диверсиялық қорғанысын ұйымдастыру, шахид-қайықтар мен шахид-дрондардың шабуылына тойтарыс беруді ұйымдастыру, өміршеңдік үшін күресті ұйымдастыру, өртке қарсы күрес, шартты жаудың соққыларының салдарын жою әрекеттерімен танысты.

«Мен облыстық телеарнаның журналисімін. Арнамызда әскерилердің өмірі, әскери-теңіз күштерінің жұмысын көрсетуге арналған хабар бар. Мен жүргізуші ретінде үнемі әскерилердің жанында болып, түсірілім жасаймын. Бүгін де бірқатар қызықты жайтқа тап болдық. Кемелердегі матростардың тамақтары жақсы. Әскери дайындықтары да жоғары деңгейде. Олар сымбатты, өздеріне сенімді. Байқағаным, теңізшілер өздерінің осы қызметтерін мақтанышпен айтады»,- деді «Маңғыстау» телеарнасының тілшісі Айжан Сәбитқызы.

Айта кетсек, Әскери-теңіз күштерінің құрылғанына 30 жыл толуына орай 2 сәуірде М.Өскенбаев атындағы Маңғыстау облыстық филармониясында концерт өтеді деп жоспарланған.